تخطَّ إلى المحتوى
مجتمعللدراسات الثقافية والتاريخية
مجتمع

مجتمع · الحلقة 108

شهادة بلا مهارة.. كيف يصنع التعليم العربي أزمته؟

د. فايز السعودي

7 November 2026

اقرأ النص المفرغ

النص المفرغ

محاور الحلقة

  1. التعريف بالضيف، وأزمة التعليم العربي: بين التلقين ومتطلبات العصر
  2. ضرورة مراعاة الفروق الفردية في التعليم العربي
  3. مسؤولية الدولة عن تطوير فلسفة التعليم بما يواكب تغيرات الواقع
  4. ضرورة تكييف التجارب التعليمية الأجنبية مع خصوصية كل مجتمع
  5. أثر التجزئة السياسية العربية في التعليم والهوية العربية
  6. إمكانية توحيد المناهج العربية رغم اختلاف الدول العربية
  7. أهمية تطوير محتوى المناهج التعليمية بما يتناسب مع احتياجات الطلاب وبيئاتهم المختلفة
  8. تحديد مواصفات الطالب المستهدف ودورها في بناء المناهج التعليمية، من خلال تحديد المهارات والقدرات المطلوبة
  9. آليات تطوير المناهج التعليمية
  10. إعداد المعلم وتأهيله المهني في ضوء متطلبات العملية التعليمية
  11. إصلاح منظومة إعداد المعلمين وتأهيلهم المهني، وتحسين مكانتهم المادية والمعنوية لضمان جودة العملية التعليمية
  12. أهداف العملية التعليمية: بين إنتاج المعرفة وتلبية احتياجات سوق العمل
  13. غياب التخطيط في اختيار التخصصات الجامعية ومواءمتها مع احتياجات سوق العمل
  14. غياب الاستقرار الإداري والتخصص التربوي في قيادة المؤسسات التعليمية وأثره في تطوير التعليم
  15. غياب الرؤية الواضحة والتخصص التربوي في إدارة وزارات التربية والتعليم وأثره في إصلاح المنظومة التعليمية
  16. أهمية التكامل بين مؤسسات الدولة والمجتمع في تطوير التعليم وبناء الإنسان القادر على الإنتاج

التعريف بالضيف، وأزمة التعليم العربي: بين التلقين ومتطلبات العصر

باسم: أهلًا بكم، أنا معكم باسم الجمل، في حلقة جديدة من برنامج «مجتمع». في حلقة اليوم نلتقي الدكتور والأكاديمي الأردني دكتور فايز محمد السعودي، أهلًا وسهلًا فيك.

فايز: أهلًا وسهلًا فيك.

باسم: صار لنا فترة بننتظر فيك يا رجل.

فايز: وإحنا كذلك.

باسم: سعودي يوحي بأنك من السعودية، ولا لأ؟

فايز: لأ. تعرف، دكتور كنا متنقلين ببلاد الشام. إحنا جدنا اسمه سعود.

باسم: سعود؟ نسبة للجد؟

فايز: نعم، لكن إحنا من جنوب الأردن، من الطَفيلة، سكنا في تلك المنطقة من أكثر من 300 أو 400 سنة، ومستقرين في جنوب الأردن، في محافظة الطفيلة، في بلدة بصيرا، بصيرا طبعًا هاي موجود في عندها بصرا الشام، اللي هي المدينة الأدومية القديمة بنفس بصيرا.

باسم: هي نفسها بصيرا؟

فايز: أيوة، بصيرا الشام اللي فيها كان يحكم الأدوميين. يحكموا، تعرف، في ظل فترة معينة، كانت الحضارة الأدومية السائدة في منطقة الأردن.

باسم: ليش ما صغرها؟ ليش ما خلوها على بصرا؟

فايز: لأ، هو اسم بصيرا جاي بناءً عليها، بس رتبوها بهذا الشكل؛ لأنه فيه تغيرت أسماء كثيرة في ظل التاريخ، وتطور الاجتماعي والتاريخي، والحضاري للمجتمع بشكل عام.

باسم: جميل جدًا، دكتور أنا عجبتني سيرتك المهنية، أنك أنت مختص في التعليم والتربية وصياغة المناهج، وهذا موضوع حقيقةً يؤرق في المجتمعات العربية.

يلاحظ أنه فيه حتى نسبة التعليم، ما بدنا نضخم الكلام كنقول فيه انهيار، لكن فيه تراجع، فيه ترهل، حتى مخرجات التعليم ضعيفة. بتشوفها عند المستويات، حتى اللي في الجامعة، تحس أنه مستوى تلميذ، مش مستوى طالب جامعي، أكيد فيه أسباب متراكمة في الموضوع، وأنت عفوًا، درست تربية، ودَرست في التربية، وكنت معلم، وأصبحت وزير في التربية، يعني، مارست الموضوع من جوانبه. فأنا أرى أنك من الأشخاص الأكثر ملاءمة للحديث عن هذا الموضوع، لماذا هذا الترهل في التعليم عند العرب؟ على فكرة، في كل المجتمعات العربية؟

فايز: سيدي، حينما تعود إلى التاريخ، يعني، فيه فترات معينة كان العرب كثير مهتمين بالتربية والتعليم، كان عندهم إبداعات. يعني بدي أحكيلك: من زمن الدولة العباسية الأولى، الآن فيه كثير من الأفكار التربوية تستخدم في كثير من دول العالم؛ التعلم باللعب، التعلم باللعب، اللي وضع أساسه هو الفارابي سنة 253 هجري، في ظل نهضة كبيرة في المجتمع العربي الإسلامي في الدولة العباسية.

وهناك أفكار كثيرة تتعلق في كثير من القضايا التي ترتبط بأساليب التدريس، يعني محكات التفكير، هذا أسلوب تدريسي كان يستخدم في ذلك الوقت. الآن لماذا التراجع؟ التراجع له أسباب كثيرة قد تكون سياسية؛ قد تكون اجتماعية، قد تكون لها علاقة في بعض الأدوات التي يجب أن تتوفر لظهور تغير، أو فلسفة جديدة في التربية والتعليم تواكب الحضارة، وتواكب التطور العالمي.

يعني، لو بدي أجيلك بعدين، بدينا إحنا في ظل الاستعمار، الدولة العثمانية. بدينا، يعني، تظهر عندنا بعض القضايا الجيدة في التعليم برعاية هاي الدولة الإسلامية الكبيرة. وبعدين تراجعنا من بداية القرن الماضي، من بداية 1900 في القرن العشرين، بدينا نشعر فيه تراجع من هنا وهناك.

في سبعينات القرن الماضي كان فيه كتير اهتمام بالتعليم، وكان التركيز في التعليم على المعرفية الغاية، وليست هي الوسيلة. الفلسفة كانت مرتبطة أنه فلسفة التعليم في الدولة العربية أنه فيه معرفة، الطالب بدنا نخزنها في دماغه، اللي بيسموه التعليم البنكي.

فكنا إلى حد ما نستطيع أن نلبي حاجة الطلبة في ذلك الوقت. لما ظهرت الثورة الصناعية الرابعة والسوشيال ميديا، لم تتغير فلسفة التربية والتعليم في الدول العربية كافة.

باسم: بقيت كما هي.

فايز: بقيت كما هي. تتعامل في قضايا معينة تقليدية؛ أنه الطالب بنك يُخزن فيه المعلومات، واستعادة الامتحان. هذه الفلسفة اللي كانت سائدة. وفي بعض القضايا يتحدثون في جزئية بسيطة لها علاقة بالتدريس والمهارات، مهارات القرن الحادي والعشرين، لكن ظل المنهاج نفسه.

يعني، شوف هذا التناقض ما بين المنهاج، اللي هو الطريق، والمحتوى والتقويم. يعني، بقي المنهاج يركز، يتحدث. يعني، حتى إحنا بالأردن سنة 2002 بدينا نتحدث عن تطوير التعليم نحو اقتصاد المعرفة، بمعنى أنه فيه اقتصاد للمعرفة، بمعنى أنه أصبحت المعرفة هي وسيلة للتعلم، وليست غاية.

قبل كانت هي غاية، الطالب يحفظ المعلومات، وهو مطلوب منه هيك، حفظ ويعيدها في الامتحان، ويدخل الجامعة، هناك بالجامعة طريقة التعليم مختلفة، مرتبطة بالكفايات، والمهارات المتخصصة. فبعض الطلاب يكون واصل للجامعة ضمن مسار تعليمية ممتاز، باستثناء ليست قاعدة؛ لأنه بحكيلك: ليش أستاذنا؟

وكان يذهب إلى تخصص، ويبدأ في هذا التخصص، وطالب آخر يذهب إلى هذا التخصص، ولا يبدأ في هذا التخصص؛ لأنه ذهب إلى المسار التعليمي غير المناسب.

لذلك صارت فيه خلل في توجيه الطلبة؛ لأنه لم تكن القدرة والذكاء والميول هي الأساس.

هذه فلسفة كتير مهمة في التعامل مع الطالب. الطالب هو مجموعة من القدرات…

ضرورة مراعاة الفروق الفردية في التعليم العربي

فايز: يعني، ربنا لما خلق الإنسان، حكمته أنه خلقهم بقدرات مختلفة. ما فيه إنسان مشابه لإنسان بالذكاءات الفكرية. ما فيه لما تيجي للمدرسة العربية، في الوقت اللي لازم هي تراعي الفروق الفردية، لم تراعي الفروق الفردية، اعتبرت الطلبة نسخة واحدة، أنها تعاملت في الأول…

باسم: على أساس أنهم جنود متشابهين.

فايز: تعاملت في الأول في أن المعرفة كغاية، أنه خلاص فيه مخزن، هذا المخزن موجود عند كل طالب.

باسم: لازم تحفظ كذا.

فايز: لازم تحفظ، لما إجوا بدهم يراعوا، وظهرت الرقمنة، وظهرت السوشيال ميديا، والثورة الصناعية الرابعة، وجدنا نفس الطريقة: نتعامل مع الطلبة كنسخة واحدة. ما راعينا الفروق الفردية، ما عرفنا أنه كل طالب إله نمط تعليمي مختلف، نمط سلوكي مختلف، مؤثرات معينة إلها علاقة.

صحيح، فيه قواسم مشتركة بين البشر، يعني فيه أشياء لازم يعرفوها كل البشر؛ لأنه حتى يديموا الحياة، عمارة الأرض، هذا معناه.

باسم: منظومة السلوك، منظومة قواعد القيم.

فايز: المهارات في الحساب، مهارات اللغات، المهارات الاجتماعية، فيه المهارات الرياضية البسيطة، المهارات المهنية. يعني، كلنا بنلاحظ لما بنتعامل مع البيت، كنا فيه تساوي بينا، لكن الذكاءات الأخرى لأ، مختلفة. فلم تراعي الأمر العربي بشكل عام هاي الذكاءات والقدرات، ولم توجه لها الاهتمام، فظلينا نتعامل مع الطالب كنسخة واحدة. هاي القضية مهمة.

يعني الفلسفة بقيت نفسها رغم أن الواقع تغير. أصل الفلسفة تغير في تغير الواقع، خصوصًا فيه حقيقة بالتعليم كنظرة عامة: التعليم وفلسفته تتغير مع الزمن. يعني، كل عصر إله نمط تعليمي مختلف، كل زمن إله منهاج مختلف، كل زمن تعامل مع المجتمع بشكل مختلف.

لكن، للأسف الشديد، بقينا نتعامل مع المعلم كنسخة سابقة تقليدية. زي ما المعلم كان قبل 20 سنة بدنا إياه الآن، وهذا لا يجوز؛ لأنه اختلفت الفئة المستهدفة، والفئة المستهدفة نمت لديها قدرات عقلية متميزة ليست بفضل المدرسة، هي بفضل السوشيال ميديا، والعولمة، فنمت لديهم.

المدرسة كما هي، والطالب تفوق على المدرسة. تيجي المدرسة العربية بدها ترجع الطالب إليها.

باسم: ترجعه إلى تحت.

فايز: فصار فيه فجوة كبيرة ما بين التعليم، ومجتمع التعليم، والطالب كفئة مستهدفة رئيسية، والأسرة كمان بنفس الطريقة، بنفس الشيء. ترى، زي المدرسة، ثبتت في نفس المستوى، لم تتعامل مع هاي العقلية التي لديها مهارات، لديها قيم. هاي المهارات تتغير مع الزمن سريعًا. نحن بقينا كما نحن بمهاراتنا، بمعارفنا في المدرسة، أو في الأسرة.

لذلك الآن فيه انفصال عام كبير ما بين شخصية الأجيال، وبيئة المدرسة، وبيئة الأسرة.

وفيه انفصام آخر كمان ما بين المجتمع وبيئته، وبيئة الأسرة، وبيئة المدرسة، ولذلك الآن طالب الوطن العربي يعيش في حالة انفصام، انفصام نفسي، إله علاقة بأنه البيئات التي حوله غير منسجمة.

الأصل أنه المدرسة تعلم شيء، وأنا اقترحتها لما كنت وزير، يكون فيه دليل لدى المدرسة يوزع على أولياء الأمور، نتحدث عن ما هي مواصفات البيئة التعليمية؟ وما هي الفلسفة الرئيسية بأدوات بسيطة، اللي بيستخدمها في المدرسة من أجل التعامل مع الابن؟ الأسرة بدها تقوم بهذا الدور، المجتمع؛ لأنه هو آباء، وهو موظفين، بينتقل هذا المفهوم والمعرفة إلى المجتمع. الآن برضه كمان بنحكي عن المجتمع الرقمي اللي لازم كمان الإعلام يشاركنا به.

وكان في ذلك الوقت بنعمل دليل نوزعه على كل الجهات المعنية في الأبناء، سواء في المسجد، أو في البيت، من خلال السوشيال ميديا، أو التلفاز، أو مراكز، أو حتى مركز العمل.

أعتقد إذا إحنا استطعنا أنه نعيد النظر في الفلسفة، وبناء البيئة التعليمية في إطار المدرسة، وفي إطار الأسرة والمجتمع، والوسائل المؤثرة على الإنسان، أعتقد أنه سيكون لدينا مخرجات تعليمية متميزة. وتكون فلسفتنا يعني للأسف أنه ما نتعامل مع الطلبة بفلسفة تلقينية، الفلسفة التلقينية هي: أنه فلسفة بنعتبر الطالب كمخزن للمعلومات، هو ليس مخزن، هو مبدع، والدليل على ذلك الإبداع هو ما نلاحظه الآن لدى أبنائنا بقدرات متميزة إذا تم توجيههم صحيح.

لذلك أنا أعتقد أنه يجب أن تنتقل كل الدول العربية لتغيير فلسفتها التعليمية، باعتبار أنه هذا الطالب لديه قدرات، وميول واستعداد ترتبط بذكاءات خاصة. فيه عندنا يمكن ثمان ذكاءات، يمكن في المستقبل يكتشفوا ذكاءات أخرى.

هم يتعاملون بجزئية معينة لها علاقة بالتحصيل. التحصيل هو عنصر بسيط من كل الذكاءات.

فنحن حينما نسأل بالرياضيات، ويجيب الطالب بامتحان تحصيلي، هو امتلك فقط شيء له علاقة بالتحصيل بالرياضيات. لما ييجي الواقع لا يستحيل يطبقه؛ لأنه نحن ما قيمنا المهارة.

فإذا بدنا ننجح بالوطن العربي، حتى نخفي ما تحدثت فيه من فجوة كبيرة، ومن تراجع، يجب أنه نهتم بهذا الطالب، بذكاءاته، بقدراته، ميوله من بداية التعليم إلى نهاية التعليم، ويتم اكتشاف الذكاء، يعني خليني أحكي: اكتشافها، وتنميتها وتوجيهها.

مسؤولية الدولة عن تطوير فلسفة التعليم بما يواكب تغيرات الواقع

باسم: يعني، هل إشكاليتنا هي إشكالية سوء اختيار المنهج، يعني طريقة التفكير؟ أم أنه فيه فجوات في العلم ما بين الجيل إلى الجيل اللاحق؟

فايز: صحيح. لأ، هو إحنا مشكلتنا في عدم بناء فلسفة جديدة للتعليم مرتبطة بالواقع.

الواقع متغير. الآن حتى دور المعلم لم يعد هو الدور التقليدي، ولا دور ولي الأمر، ولا دور أفراد المجتمع، ولا دور الطالب. ولا المنهاج. المنهاج يجب أن يكون مرن.

للأسف الشديد، الآن الوزارات العربية بتعد منهاج وفيه محتوى. طيب وين الخبرات؟

باسم: قبل ما نتحدث عن المنهاج، حابب أنا مسؤولية من؟

فايز: مسؤولية الدولة بشكل عام، مسؤولية الدول.

باسم: الدول الاعتبارية؟

فايز: صحيح، مسؤولية الدولة بما تملكه من قدرات ومؤسسات. بتعرف، الدولة هي ميناء سياسي، لكن فيه مؤسسات، إحنا للأسف الشديد، لا تستطيع أي مؤسسة أن تقوم بهذا الدور لوحدها. لما أقول تربية وتعليم، أنا ما بقدر أحمل وزارة التربية والتعليم هذا التراجع، أنا بحمله للمجتمع بشكل عام، للدولة كجهة موجهة للمجتمع.

يعني، هسا مشكلتنا إحنا، مثلًا، في التعليم واضحة. أنا القضايا اللي بتحدث فيها قضايا، واللي بيتحدث فيها قضايا فلسفية، لها علاقة بفلسفة التعليم. الفلسفة، للأسف الشديد، الموجودة في القوانين هي فلسفة منسوخة، منسوخة عن فلسفة قديمة.

يعني، ما فيه عندنا إبداع؛ لأنه العقلية العربية، كما تحدثنا سابقًا، عقلية تخلت عن اجتهاد وقياس، وبالتالي هي عقلية تنسخ ما موجود في الكتب القديمة، أو ما موجود في بعض الدول، وتنقلها إلى قوانينها، سواء قوانين تتعلق بالتعليم، أو التربية، أو التعليم العالي، أو التعليم العام.

ضرورة تكييف التجارب التعليمية الأجنبية مع خصوصية كل مجتمع

باسم: نقل التجارب المعرفية، أو التعليمية للشعوب المختلفة، من يتخذ قرار بنقل التجربة؟

أوك، نحتاج إلى التعلم من الآخرين، طب مفيش طريقة لدمج هذه الطريقة في ثنايا ثقافتنا التي تتلاءم مع مجتمعاتنا، مثلًا؟ لماذا نجيب تجربة من الآخرين نفرضها، وبالتالي نرميها على المجتمع ونقول: تفضل تعامل معها؟

فايز: هون القضية الأساسية، أنه تأخذ تجربة بكل حيثياتها تسقطها على مجتمع، لأ، لماذا؟

لأنه فيه تطور تاريخي له علاقة في كل دولة. يعني، لما تيجي بدك أنت المعايير البريطانية في التعليم العام، لو بتيجي تطبقها في الأردن ما بتقدر؛ لأنه إحنا لسه ما طبقنا معايير تربوية ولا إدارية.

وبالتالي أنت بتيجي تأخذ الخبرة، تستفيد منها: كيف شغلوها؟ ما هي الفوائد؟ ما هي الإيجابيات؟ السلبيات؟ ما هي الواقع اللي انطلقت منه هذا التطوير؟ تيجي تسقطها، تيجي وتناقشها في جلسات في كل دولة عربية. على فكرة فيه قضايا ممكن تكون أساسية في كل الدول العربية، ممكن نسوي منهاج عربي، وهذا اقترحناه لما كنا بالوزارة في الإمارات.

وممكن أنت تحط منهاج آخر إله علاقة في كل دولة؛ لأنه فيه خصوصيات، الخصوصيات مرتبطة بالنظام السياسي، مرتبطة بالخبرات في ذلك المجتمع.

يعني، الأشياء الموجودة في ذلك المجتمع، للأسف الشديد إحنا بعض الأحيان يا إما ما بناخد ولا إشي من أي دولة، وهذا خطأ، أو بناخد كل إشي. صار فيه حل وسط، الحل الوسط اللي أنا بأمل فيه، أنه بنجيب هاي التجربة الناجحة في فنلندا مثلًا، أو في سنغافورة، أو في الدول اللي صار فيه عندها ناتج محلي كبير، كتير نتيجة لإصلاح التعليم.

يعني، في سنغافورة هسا وصل الناتج المحلي الإجمالي ل 500 مليار. لماذا؟ لأنه الإنفاق على التعليم عالي، واستخدموا أساليب كثير مرتبة في بناء البيئة التعليمية، البيئة التعليمية الشاملة.

البيئة التعليمية ليست مقتصرة على الغرفة الصفية. من الخطأ نعتبر أنه الغرفة الصفية فقط المعنية في بناء شخصية الطفل. أبدًا، كل بيئة بيعيش فيها الطفل، حتى وهو بينتقل في المواصلات، هاي بيئة تعليمية.

لذلك لازم نراعي الظروف أنه الفئة المستهدفة للتعليم في الوقت الحالي يجب كل أفراد المجتمع. إذا ما وصلنا للوعي والثقافة الرئيسية، اللي بيمتلكها كل الأفراد، لما يلتقوا مع طفل، ما يشعر أنه فيه تناقض بين من يتحدث فيه الشخص المقابل، مع ما يتحدث فيه المعلم في الغرفة الصفية، أو المشرف.

أثر التجزئة السياسية العربية في التعليم والهوية العربية

باسم: يعني، ما تصفه هو أمنية للجميع يتمنى أن نصل لها، لكن أكيد فيه أسباب موضوعية حقيقية تعيق الوصول لهذا المستوى من الفهم، أو للمستوى من الأمنية أن يكون وضع التعليم بهذا الشكل.

أنا حابب أسأل سؤال كالتالي وبالذات في المجتمعات العربية: كون الصفة عامة في كل المجتمعات العربية، يبدو لي، ويمكن الاستنتاج أنه الأسباب التي تقود إلى أن يكون نظام التعليم فيه تدني، يعني متواصل، أنه الأسباب متشابهة.

هل للتقسيم السياسي عند العرب دور؟ هل للتوزع إلى دول قطرية له دور مثلًا؟ هل هذا أثر على ضياع الهوية الثقافية عند الفرد العربي مثلًا؟ صحيح أنه مرات المجتمع المخصص، أو الخاص، له مكوناته الشخصية، لكن فيه تأثيرات أكبر من قدرة هذا المجتمع أن يتصدى لحلها، دون ما يأخذ من المجتمعات الأخرى المتشابهة؟

فايز: شوف، النقطة اللي حكيتها، نقطة عميقة، تمثل الواقع العربي. بصراحة، إذا ما فيه إجماع عربي سياسي، اقتصادي، اجتماعي بمفهومه التقليدي المجتمعي، لكن مفهومه السياسي معروف، أنه بدنا هوية عربية واحدة، هوية متفق عليها ننطلق منها، نفكر من خلالها، أعتقد هنا هو الأساس لنجاح التعليم في الوطن العربي، ليس فقط التعليم، بل الاقتصاد، والسياسة، والاندماج؛ لأنه إحنا ما ممكن نفكر كل واحد لحاله.

إحنا تفكيرنا بيكون متميز لما بنكون كلنا مع بعض. لماذا؟ لأنه الله حبا هذه الأرض العربية بمقومات، وهاي المقومات ثقافية، تاريخية، عميقة، أثرية.

فهذه القوة بتعطينا هي القوة دافع للعمل؛ لأنه إحنا بنعيش في كيانات سياسية معينة، نشعر أنه فيه انخفاض بالأفق، أو ضعف في الأفق العام في التفكير.

باسم: قصر الأفق…

فايز: هذه أمنية كبيرة تحققت، على فكرة. كل الأشياء السلبية في التعليم، وفي غيرها بتنتهي. لكن أنا بدي أحكي بالواقع. هسه، من خلال هذا الواقع، بدنا نفكر. لازم تكون مناهجنا مناهج عربية، بغض النظر عن الدولة.

يعني، فيه قضايا مشتركة، وعلى فكرة المناهج الأردنية في فترة معينة، والآن، تتحدث عن الجغرافيا العربية، التاريخ العربي، هذا جميل كتير. خلي الطالب يعيش في ظروف معينة منفتحة، يشعر أنه على أرضية قوية، ينطلق منها في التفكير؛ لأنه أنا كل ما كانت أرضيتي اللي أنا واقف عليها قوية، أرضية صلبة، بشعر فيه أنه عندي مكانة اجتماعية كفرد ومجتمع. أعتقد هنا البعد التفكيري، وعمق التفكير، وبعد التفكير يكون أفضل. هاي قضية.

لذلك، أنا الدعوة عامة أنه تستطيع، أنه يكون فيه عندنا، بغض النظر عن الأنظمة السياسية، بدناش ندخل في هذا الوضع، نقول فيه شيء عربي عام: هذا المنهاج العربي، سواءً في التاريخ، أو في الجغرافيا. هسه بتيجي المواد العلمية، والتربية الوطنية، هاي أربع مرات تختصر على البلد، ما عندنا مشكلة.

هذا التفكير حتى وصل للنتيجة اللي تحكي عنها. مع ذلك، ننتقل إلى الداخل. الداخل يجب أن نتحرر من كل المؤثرات، أنت فيه عندك إنسان بدك تلغي شخصيته.

يعني، فيه سؤال كتير مهم بسأل حالي: حتى أنا أنجح في ظل الكينونة القطرية، كيف أستطيع أن أعمل؟

أول شيء، تفهم الواقع اللي نعيش فيه: ما هو المطلوب مني بشكل عام كمؤسسات؟ ما هو الطالب اللي بدي إياه؟ على فكرة، صفة الطالب هي مخرجة في الوطن العربي واحد، أنا بدي مواطن يؤمن بعروبته، بدينه، الدين الحقيقي، اللي ما فيه تفرقة، فيه حريته، يفكر بانطلاقة كبيرة، يكون فيه عنده لغة حوار مع الآخر، يتفهم الآخر، مش يرفضه.

يعني، فيه تقبل للرأي والرأي الآخر؛ لأنه فيها إشكالية.

يعني، مرات نطرح فكرة، الكل بيصدم: هذا بده يحكي، يا سيدي هذا رأيه. بالأخير، هو رأي فيه ثوابت معروفة. ولذلك، استطعنا أن نصل إلى هذا النظام، وهذا التحرر، وإعادة النظر في الفلسفة التعليمية بهذه الطريقة.

أعتقد أننا سنحقق المطلوب، إذا بدنا ننظر أنه إحنا، حتى نتحرر من الأثر السلبي على فكرنا، وعلى طموحنا في وجود دولة عربية واحدة بنعيش فيها…

إمكانية توحيد المناهج العربية رغم اختلاف الدول العربية

باسم: أنا ضد بنحلم، نحن في الواقع. سؤالي كان ينطلق: هل الواقع السياسي الموجود حاليًا على المجتمعات العربية؟ وكل مجتمع، لا شك له، خصوصيته، سواء في اللهجة، ولا في طريقة تناوله للمعرفة، لكن فيه مشتركات كبيرة جدًا في اللغة، في الدين، في الجغرافيا، في العرق، في الثقافة، في التاريخ، في كل شيء.

هذه المشتركات اللي موجودة، أنت كنت وزير تربية، وأكيد كنت تجتمع مع وزراء التربية في المجتمعات العربية، أو في الدول العربية الأخرى. هاي المشتركات مكانش كتير، مثلًا فيكم كوزراء تربية؟ كإخوان؟ فيه عندنا مشتركات، خلينا نفعلها. أوك، فيه اختلافات، وفيه خصوصيات لكل مجتمع، وكل دولة عربية، لكن هذه المشتركات أكثر، وأوسع، وقدرتها على التأثير أوسع.

فايز: هي، سيدي، ما بدها قرار سياسي، لا من وزير، ولا من شيء، هي واقع؛ يعني كل دولة عربية، إحنا بنعيش ضمن الوطن العربي، يستطيع… لكن أنه كيف الطريقة محفز؟

تحدثنا في ذلك التقينا نحن في دبي في ذاك الوقت مع وزراء تربية وتعليم العرب، وكان لي كلمة رئيسية قلت: أنه يجب أن يكون لدينا أشياء مشتركة. إحنا عندنا جامعة دول عربية، مدام عندنا جامعة دول عربية، ومعنية بالبعد السياسي، ليش ما يكون عندنا منهاج عربي؟

أه هذا المنهاج سهل، لا بنحكي عن الدولة القطرية، ولا عن سياسة، بنحكي أنه فيه أشياء عامة، زي ما حكيت. ما فيه مانع.

هسه كثير من الدول العربية، على فكرة، فيه عندها مواد بالتاريخ والجغرافيا بتاعتها في الوطن العربي. فيه، بنتحدث بالأردن، بنحكي بالوطن العربي، خريطة الوطن العربي، تاريخ الأمة العربية، بنحكي فيها. وهذا على فكرة، أعتقد أنه موجود، لكن إذا مش موجود، هذا لا يتعارض مع البعد السياسي، والنظام السياسي لأي دولة عربية.

لكن هذه واحدة من القضايا اللي لا بد نركز عليها، وأنا بحكي فيها أمامك، دكتور باسم، وإن شاء الله بتوصل الرسالة، أنه ما فيه مانع. الآن بنيجي إحنا بالداخل. على فكرة.

المفاهيم التعليمية متشابهة في العالم كله، متشابهة، المفاهيم الرياضية، ويجب أن تتشابه، لماذا؟ لأنه هي قوانين، هي عبارة بيسموها «كتب تدريسية»، و«مفاهيم تدريسية».

الآن، وين الفرق؟ الفرق بالمحتوى. يعني، أنا ممكن آخذ مفاهيم الرياضيات من أي دولة في العالم، على فكرة بسهولة.

باسم: ما هتتبدل أصلًا.

فايز: الآن أنا فكرتي الأساسية حتى نعطي مجال لكل دولة تعمل، وتعد مواطنها وفقًا للمحتوى الاجتماعي، محتوى للخبرة، أن يكون هذا المحتوى من صلاحيات المشرفين، والمعلمين في كل منطقة تعليمية، وهذا أنا طرحته بالأردن، وكنت بدي أشتغل عليه في 2010.

أهمية تطوير محتوى المناهج التعليمية بما يتناسب مع احتياجات الطلاب وبيئاتهم المختلفة

باسم: في هذه النقطة، أنا كنت حابب، أنت وصلتني لها قبل السؤال، أنه وضع ما يسمى بالمناهج، سواء على المناهج، أو محتوى المناهج، هو مش بس المحتوى، صياغة المحتوى.

أنا لاحظت أنه هاي المحتويات الموجودة في المناهج التربوية التعليمية عند العرب متبدلة باستمرار، ومرات تخضع لأهواء سياسية، أو حتى لأهواء لا علاقة لها بالمجتمع.

تبديل هذا المحتوى، أثره وين؟ هل هي مثلًا من الأسباب التي أدت إلى تدهور التعليم مثلًا؟

فايز: صحيح، بدي أحكيلك القضية اللي بتحكيها كتير مهمة. فيه شيء بيسموه بالعلم. أول شيء، المنهاج هو الطريق، ليس المحتوى. المنهاج هو الطريق الذي تسلكه الأنظمة التعليمية من أجل تحقيق الأهداف.

باسم: أوك، أنا أتحدث عن المحتوى: من يصوغ المحتوى؟ من يشارك في صياغته؟ من يقدمه لنا؟

فايز: هذا المنهاج يجب أن يعد له إطار عام للمناهج. بحط أنا كل الأفكار المتعلقة بهذا المنهاج، هذا الطريق اللي بدي أنا يسلكه الطالب في هذا النظام التعليمي لأي دولة.

كيف تكون صياغته؟ هل هو مبني على النتاجات التعليمية؟ ولا على الخبرات التعليمية؟ ولا مبني على الأهداف السلوكية؟ ترى كل وحدة مختلف.

بعدين باجي بقول: أوك، ما هو المحتوى اللي بده يوصلني؟ ما هو المحتوى اللي بده يوصلني؟ هسه المنهاج، أوك، إطار عام للمنهاج يحتوي على كثير من الخطوط العريضة، ومن نتاجات التعلم، ومن خرائط المفاهيمية، انطلاقًا من الصف الأول التوجيهي، ومن هاي القضايا المهمة.

هسه الأشخاص اللي بدهم يحطوها أشخاص المختصين بالتعليم، مختصين بالمادة التعليمية.

لماذا؟ لأنه هدول أحرف بالإطار العام للمناهج. الآن فيه كثير من الدول العربية ممكن تستعين بأشخاص من الجامعة، مختصين في المادة التعليمية. أنا مع ذلك، لكن يجب كمان أن نلجأ للمعلم.

المعلم هو الذي يعيش الظروف اليومية مع الطالب، ويعرف ما هو المحتوى؟ وأقرب لاحتياجات الطالب.

إضافة أشخاص في منظومة التدريس، مختصين في المناهج بشكل عام، أساليب التدريس، مختصين في التصميم. هذول يشتركوا مع بعضهم ضمن سياق معين، وأن يعملوا مع بعض، مش كل واحد بشكل منفصل؛ لأنه للأسف الشديد، شو اللي بيصير بالتطوير؟ بييجي كل واحد بيشتغل لحاله، ويجمعوا المادة في الكتاب المدرسي، بيكون هاي المادة غير متناسقة.

وجود مادة متناسقة في الكتاب المدرسي وفي المناهج كتير تحقق الأهداف؛ لأنه خلاص، فيه وسيلة واحدة لتحقيق الأهداف مش أكتر من وسيلة، فهاي القضية مهمة فيما يتعلق بالأشخاص المعنيين، يجب أن تكون لجنة مختصة، ليس فقط في المادة التعليمية بتصميم التدريس، القياس والتقويم، بمختصين في المناهج، وكذلك مختصين في اللغة العربية؛ لأنه مرات بتصير تسوي منهاج الرياضيات.

فإذا كان هدول الأشخاص بيشتغلوا ضمن خطة معينة، بعتقد بيطلع المنهاج منهاج متكامل، ومنهاج هادف.

الآن، فيما يتعلق بالمحتوى، هنا الفرق. المحتوى، بعض الأنظمة العربية بتعد محتوى واحد.

ما هو المحتوى؟ المحتوى هو بعض الصور، وبعض الأحداث المرتبطة بالبلد كاملة، لكن بعض الأحيان يشوفها الطالب في منطقة تعليمية، ما بيشوفها في منطقة تعليمية أخرى.

يعني، مثلًا، كتاب التربية الوطنية محتوى واحد؛ لأنه مرتبط بالنظام السياسي. الجغرافيا والتاريخ، بدك هون تعطي أمثلة من الواقع. لذلك أنا مع إعداد بيسموه «المنهاج التوليدي».

المنهاج التوليدي، منهاج بيكون في الكتاب المدرسي عبارة عن «تيكست بوك»، كتاب تدريسي موجود في المفاهيم، موجود في توقعات، والمحتوى يبقى من صلاحيات المعلم، والمشرف في المنطقة التعليمية.

شوف هون شو سويت أنا، أنت سألتني سؤال: ما هو الخلل؟

الخلل: أنا طالب بتعلم في منطقة تعليمية بالوطن العربي، أعطوني أمثلة ما لها علاقة بمنطقتي، ما شايفها أنا. أنا ما بتعلم كويس، ما بتغير شخصيتي كويس؛ لأنه أنا مش شايف هذا المثال، مش شايفه.

أنا مش شايفه في عَمان، أنا بشوفه في تونس، أنا بشوفه بالقاهرة. ابن القاهرة محتوى مناسب له، بيكتسب المعرفة والمهارة بمستوى ممتاز، لذلك مخرجات التعليم بتطلع قوية.

المشكلة الآن المحتوى واحد في كل، مثلًا بالأردن خلينا نحكي، محتوى واحد بيدرسه الطالب من إربد إلى العقبة. طيب خبرات الطلبة، والأشياء اللي بيشوفها…

باسم: متفاوتة.

فايز: متفاوتة. الحل وين؟ أنا كمختص، فيه شيء بيشوفه الطالب بالأردن بشكل عام، هذا بخليه كمحتوى، لكن بحط محتوى متوقع للمعلمين والمشرفين في المناطق التعليمية، بحيث يختاروا هم محتواهم.

هون شو اللي بيصير؟ بدل ما تغير الكتاب، الكتاب يبقى عشر سنوات؛ لأنه المفاهيم واضحة، ما فيه تغيير. القانون والمفهوم ما بيتغير. اللي بيتغير المحتوى، بتخلي المحتوى يتغير.

المحتوى تكلفته وجهده أقل؛ لأنه يتم إعداده بمواصفات معينة في كل منطقة تعليمية، وقد يكون مش كتاب مطبوع، قد يكون دوسيهات وأوراق عادية، بيقتنعوا فيه المشرفين والمعلمين.

هاي من القضايا اللي طرحتها في الأردن، وكنا بنشتغلها، ونعالج مشكلة أنه في بعض المرات بيكون فيه ضعف، ومخرجات تعليمية غير مناسبة، خصوصًا في امتلاك نتائج تعليمية المحددة لكل مرحلة تعليمية.

تحديد مواصفات الطالب المستهدف ودورها في بناء المناهج التعليمية، من خلال تحديد المهارات والقدرات المطلوبة

باسم: عند اختيار المنهاج والمحتوى، أنت ذكرت مجموعة من المختصين بجوانب مختلفة تتجمعوا وتشكلوا فيه. هل هناك صورة محددة لشكل المواطن، اللي أريد أنا أن يتخرج؟ وأن يخرج نتيجة هاي المحتوى اللي أضعها؟ عندنا تصور نريده مواطنًا بهاي المواصفات، وبالتالي يحتاج أن يكون عندي منهاج ذاته: واحد، اتنين، تلاتة، أربعة لتخرج هذه الشخصية. هل هذا موجود؟

فايز: هذا لازم يكون موجود. هسه بعض مرات بيقفزوا عن هاي الخطوة، بيعدوا الإطار العام ويحطوا فيه مجموعة نتاجات تعلمية. النتاج، ما هو النتاج؟ هو شيء بده ألاحظه على الطالب، مارسه الطالب، عمله الطالب، سواءً في اللغات بشكل عام، أو في العلوم الإنسانية، أو في العلوم التطبيقية.

الأصل أنه يكون بالبداية، قبل ما أفكر في الإطار العام، أحط مواصفات المواطن العربي اللي بدي إياه. أقول: والله أنا بدي طالب لما يتخرج من الثانوية العامة، أن يكون لديه قدرة في التكيف، لديه مهارات حياتية متميزة، لديه مهارات عامة بيسموها «سوفت سكيلز» في قضايا معينة، لديه مهارات اللغات، ومهارات الحساب. شوف لما أحدد هاي النقاط كله، أنه شو بدي إياه…

باسم: بناء عليها، يُصاغ محتوى المنهاج.

فايز: بعد ذلك، لما أحدد مواصفات الشخص اللي بدي إياه، اللي بده يتخرج بعد 12 سنة من التعليم العام؛ لأنه بده يروح على الجامعة، برضه بده يروح على الجامعة، بده يكون جاهز للتخصص الجامعي. هاي واحدة من القضايا.

باجي على كل قضية، صفة من الصفات اللي بدي إياها، وأترجمها لخريطة مفاهيمية مرتبطة بمراحل النمو. شوف، ترى، الطالب في مراحل نمو تبدأ من «الكي جي 1» رياض الأطفال، لغاية الجامعة. بدي برضه لما أحط الخريطة المفاهيمية، ما أحط مفاهيم صعبة، تتدرج المفاهيم من الأبسط…

باسم: بتدرج العمر.

فايز: أحسنت. شوف، أنا جيت أول شيء حطيت مواصفات الشخص، وهاي مهمة، وأخذت صفة صفة.

يعني، لما أقول بدي يكون عنده مهارات، مهارات بإيش؟ باللغة، ولا بالحساب؟ بدي أشتغل عليها. بدي أقول: متى يتعلم الطالب من رياض الأطفال؟ متى يتعلم يمسك القلم؟ متى يتعلم يستمع؟ متى يتعلم يتحدث؟ متى يتعلم يقرأ؟ كل وحدة لها زمن.

باسم: يعني، هذه النقاط لا يتم مراعاتها عند صياغة المناهج؟

فايز: للأسف، أنا من مشاهدتي ومن معرفتي، ما بتتم. هم بيشتغلوا لكن دون خطوة.

آليات تطوير المناهج التعليمية

باسم: لماذا نريد تعليم الأطفال؟ لماذا نريد تعليم أولادنا؟

فايز: هو هذا السؤال المهم. إذا أردنا أنه يكون عندنا منهاج يراعي سؤال معين: ماذا نريد من أبنائنا عند التخرج من الثانوية العامة؟ أعتقد هذا الإجابة عليه بيخليني أقف على أرضية قوية في إطار التعليم بشكل عام؛ لأنه المنهاج هو الأساس، ولسه بنحكي أن المنهاج الخفي بعد شوية له علاقة بالمعلم؛ لذلك المعلم هو الأساس.

يعني، إذا اهتمينا بالمعلم، أعدناه إعداد جيد، وكان المنهاج ضعيف، لا بيكون مخرجات كويسة؛ لذلك المنهاج السؤال الأول قبل ما أبدأ بكل شيء. من المعني بوضع المواصفات؟

كل مؤسسات الدولة، ما بدنا نحكي وزارة التربية، كل المجتمع بيصير فيه نقاش وحوار مرة واحدة.

باسم: المجتمع كله معني؛ لأنه كلنا عندنا أطفال، وكلنا نريد تعليم أطفالنا، ولكن كون هناك مؤسسات مختصة في المجتمع، وهي المخولة لذلك، هذه الإمكانية، وهذا الوعي في كيفية صياغة محتوى المناهج من مهمتها.

فايز: شوف، أنا لما كنت بالمناهج مسؤول عن منهاج التربية المهنية، كرئيس قسم مباحث مهنية، بدي أطور منهاج التربية المهنية. منهاج التربية المهنية عبارة عن مهارات حياتية.

طلبت مسؤول في ذلك الوقت، قلتله: بدي أسوي جلسة تشاورية لكل محافظات المملكة، وألتقي مع كل الأشخاص فئات. قالي ليش؟ قلت بدي أسألهم سؤال: ما هي مواصفات ابنك اللي بدك إياه تشوفه بعد ما يمر بهاي الخبرة؟ فقط هي وقت احتاجت منا شهر. كنا نلتقي ونجلس، وأنا أدير الجلسة مع زملائي، ونحكي: ما هي مواصفات ابنك بعد ما يمر بخبرة عشر سنوات في التربية المهنية؟ أعطونا أفكار كتير ممتازة، جمعناها، وصنفناها إلى ست أصناف. وبعد ما صنفناها، تم إعداد النتاجات التعليمية المرتبطة بكل صفة، بدينا نشتغل على المحتوى.

تعرف شو الطلاب انتصروا معنويًا بمنهاجنا. أصبح منهاج، منهاجًا… هذه طريقة التطوير يجب أن نلجأ إليها، سواءً بالجلسات التشاورية لما يكون مهارات عامة، أو بجلسات مع مختصين باللغة العربية، في اللغة الإنجليزية؛ لأنه إحنا فيه عندنا ضعف في مهارات اللغات.

بتخرج طالب توجيهي، للأسف الشديد، ليس لديه لا مهارات إنجليزية، ولا مهارات لغة عربية؛ لأنه تعليمهم التنتين، يعني، للأسف الشديد بده طريقة معينة، ولازم يكون فيه فريق في مراعاة للفروق الفردية في تعليم اللغات؛ لأنه فيه طالب بيتعلم الحرف إلى الكلمة، فيه طالب بيتعلم الكلمة إلى الحرف.

إعداد المعلم وتأهيله المهني في ضوء متطلبات العملية التعليمية

باسم: طيب، أنت في هذه الحالة تتحدث عن الطبقة المسؤولة، أو عن الأداة المسؤولة في تعليم الطالب، اللي هم المعلمين، وبالتالي أنت تحتاج إلى إعداد خاص لهذا المعلم.

فايز: أحسنت. بدي أحكيلك، هذه الطريقة في التعامل معاهم فيها أساسية. تعرف، المنهاج أنا بشبهه بالنظام التعليمي، القاعدة الأساسية للتعليم، البنية التحتية. إذا البنية التحتية صح، وانطلقنا، وعلى فكرة ما بدها جهد كبير؛ يعني، أنت ثانية واحدة بتشتغلها عشر سنوات، وبتعمل عملية مراجعة.

هسه، المعلم في هذا الزمن هو المحور الرئيسي للتعليم والمنهاج، وأساليب التدريس. هو البيئة التعليمية، هو كل شيء.

طيب، حتى المعلم يكون بهذه الصفات، من هو المعلم؟ هذا سؤال كتير مهم. شوف، أول شيء، أنا في رأيي، المعلم المطلوب لا بد أن يكون لديه ذكاءات متشعبة ومتعددة.

بدك تسألني لماذا؟ أي مهنة في الكون تتعامل مع حالة واحدة: طبيب يتعامل مع مريض، مهندس يتعامل عمارة واحدة، محامي يتعامل مع قضية واحدة، المعلم يتعامل مع 25 طالب، كل واحد…

باسم: جاي من عائلة مختلفة.

فايز: لديه ظروف مختلفة. طيب، حتى يتعامل صح. مش بيتعامل معهم كنسخ، كنسخ سهلة. أي واحد من الشارع حطه بالغرفة الصفية، قل له: تعامل معهم صفة، كأنه يتعامل مع طالب واحد؟ لا، المعلم يجب أن يكون لديه ذكاءات متشعبة.

بيكون مستواه وعلاماته في الثانوية العامة عالية، بس تجيب هذا المعلم، شو بدك تسوي له؟

باسم: بدك تهيئ له ظروف مناسبة للحياة.

فايز: أحسنت، ظروف معنوية، ظروف مادية؛ لأنه هذا الطالب اللي الآن بيروح على الطب والهندسة في الدول العربية، في الغرب لأ، مختلف. الغرب المعلمين في التعليم بياخدوا أعلى معدلات؛ لأنه أول شيء فيه «كلمة إنجليزية»، وفيه اهتمام فيه.

باسم: فيه طريقة إعداد مختلفة.

فايز: شوف، هاي أول قضية: بدنا الآن نختار من يذهب إلى التعليم؟ ممكن يذهب إليا مهنة أخرى، ويكون فيه عنده مشكلة عادية، أما مهنة التعليم بدك تكون أنت تقريبًا، والكمال لله.

يعني، ما عندك أبدًا ولا أي ثغرة: شخصيتك، بكلامك، بوقتك، بشكلك، ما فيه مجال.

أنا بقول أنه ما نخلق أشخاص عادية، استثنائيين، لكن أنا بقول: واقع معين، المعلم بده تدريب وتأهيل.

بده ظروف مادية ومعنوية ممتازة، بدك تظلك تتابعه، بدك توفر له امتيازات، امتيازات مريحة؛ لأنه حتى ييجي على الغرفة الصفية، ويعطي اللي عنده، بده يكون مرتاح نفسيًا لذلك أنا طالبت أنه يكون فيه عندهم وضع خاص مريح.

يعني، ما أعتقد في العالم…

باسم: حتى ما يفكر بعد الدوام أنه يروح يشتغل شغلة تانية.

فايز: أحسنت. أنه هو أصلًا مطلوب منه يشتغل 24 ساعة. أنت بأي مهنة أخرى بتخلص، ممكن تراجع لك كتاب، كتابين، بينما هو بده يراجع.

إذا كان بيدرس صف واحد، لكن لو بيدرس أربع صفوف، 100 طالب، بده يراجع خططهم، وبرامجهم، وظائفهم، وبيصلح لهم، ويسوي برنامج الغد.

لذلك أنا أعتقد أكثر الدول اللي نجحت في العالم اعتبرت المعلم نمبر 1.

والمعلم مش مسؤول عن تقديم خدمة، هو يصنع إنسان؛ لذلك هاي المهمة ليست خدمة فقط، هي قضية أكثر من خدمة، هي صناعة.

وبالتالي هو يجب أن يكون في ظروف خاصة؛ لأنه الأهم من المنهاج المكتوب هو المنهاج الخفي، المنهاج الخفي معني فيه المعلم.

طيب، إذا المعلم مش مرتاح، نفسيته مش مرتاحة…

إصلاح منظومة إعداد المعلمين وتأهيلهم المهني، وتحسين مكانتهم المادية والمعنوية لضمان جودة العملية التعليمية

باسم: وإذا قدرته على التعليم ضعيفة، وقدرته على الفهم ضعيفة، متكونش بشكل ضعيف.

هذا سؤالي كان كالتالي: هل هناك فيه منهاجية محددة لتخريج معلم، أو تصنيع معلم؟ يعني، مثلًا، فيه في الجامعة بتروح تدرس هندسة أربع سنين، أو علم اجتماع. هل فيه مهنة اسمها «كيف تصبح معلمًا» في الجامعات؟

فايز: سيدي، هاي النقطة اللي حكيتها بالذات، أنا أعتقد أنه فيه إشكالية، من يذهب إلى التعليم في الوطن العربي؟ أقل معدلات.

باسم: اللي يكون معلمًا؟ ما هو أنا سألتك؟

فايز: أقل معدلات. لماذا؟ السؤال؛ لأنه الظروف اللي بيعيش فيها المعلم بعد يتخرج كتير بسيطة. يعني، تعب وجهد، ووضع مادي كتير منخفض، ما حدا بيلبي لهم متطلباتهم، ما فيه تعزيز لهم بالمجتمع، ما فيه مكانة.

يعني، هو المكانة صحيح تُكتسب، لا تمنح، لكن هو بده كمان دعم. يعني، فيه بعض المعلمين ليس لديهم مكان حتى يجلس فيه في المدارس، بينما روح شوف الغرب كيف! يعني، زرت مدارس بالغرب، المعلم وضع خاص. ما حدا بيقدر يوصله.

باسم: إشكالية المعلم، هي إشكالية قائمة منذ زمن، مش جديدة. ما فيه حد فكر في حل، إنتاج، أو تصنيع معلم مثالي، حتى يؤدي المهمة اللي أنت تقولها لتخريج تلميذ مثالي، أو مواطن مثالي. بدناش مثالي بالمعنى…

مواطن قادر على خدمة المجتمع، ويخدم نفسه وفق المواصفات المتعارف عليها مجتمعيًا.

يعني، فيه شخص بيروح على الجامعة عشان يدرس طب، شخص يدرس هندسة، شخص بيدرس أدب، فيش شخص يدرس معلم: كيف يصبح معلم؟

فايز: لأ، يعني، هي القضية، للأسف، بنحكي بها من الناحية النظرية، لكن بالتطبيق العملي غير موجودة. أنا بحترم زملائنا المعلمين في الوطن العربي، كلهم لهم مكانة خاصة عندنا، وأنا، على فكرة، ما بفرق بين الزمن السابق، وهذا الزمن.

المعلم هو المعلم، لكن للأسف الشديد، ما حدا بيحكيلك من الثانوية: «بدي أروح معلم».

هو بيقدم على التنافس، ما فيه امتحان قبول جامعة في بعض الدول العربية، هو بيحصل على التخصص؛ لأنه معدله منخفض، بيذهب إلى التعليم، وبيبحث، على فكرة، إلى وظيفة تانية غير التعليم.

لو بيلاقي، بيروح. بالأخير، هو بيقف خلاص أمام وزارة التربية والتعليم، مفيش مجال: بدي أشتغل، فبيروح، لكن هو عينه على وظيفة أخرى.

عينه على مشروع آخر، عينه على شغل إضافي؛ يعني، هو مش فكرة طبيب رايح بيدرس طب، خلاص، أنا أهلي مرتبين أمورهم، وأنا مرتب أموري، تم إعدادي نفسيًا أنه أنا أذهب إلى مهنة الطب، أو الهندسة، أو المحاماة، أو لغة إنجليزية، أو كذا…

لكن، للأسف الشديد، هذا ما فيه توجه، ولا فيه نظرة قبلية أنه أنا، والله، راح أروح…

باسم: يعني، لماذا لا يتم وضع مساقات في الجامعات؟ هذه المساقات تؤدي إلى تخريج، أو تصنيع معلم مهني أنه يعلم في المدارس؟

فايز: فيه، بس مين بده يقبل عليها؟ ما هو بالأخير، هو في النتيجة نفس النتيجة.

إحنا في الأردن، مثلًا، لدينا أكاديمية الملكة رانيا، أكاديمية الجامعة الأردنية بتعلم، بس بعد ما يصير معلم، خلاص، بده يروح هناك ليحسن وضعه.

لكن القضية اللي بحكيها، أنه إذا بدنا ننجح زي بعض كتير من الدول، التجارب العالمية أعطت المعلم راتب عالي أكثر من كل المهن الأخرى، واعتبرت أنه المعلم لا يستطيع أن يدخل الغرفة الصفية إلا بعد سنتين من الإعداد.

بس، للأسف، فيه كثير من الدول العربية، بالتعليم الإضافي؛ لأنه فيه نقص معلمين في ذات السنة، بتعين لها أربع أو خمس آلاف معلم، لسه لم يكملوا الجامعة، ولم يتم إعدادهم مسلكيًا، وبيدخل الغرفة الصفية فقط عشان يملأ الفراغ، مش عشان يحقق أهداف العملية التعليمية.

هذه الإشكالية الكبيرة. بتعرف إذا بدنا نطور، يعني، قولتلك: أول شي تطوير المناهج، بعدين بحكيلك المعلم كأساس. المعلم يجب أن يتم اختياره، ويكون دخله، ووضعه المعنوي، ووضعه النفسي، وإذا رفعنا رواتب المعلمين، وأنا بحكيه هذا مطلب، مش هيك ترف، مش تقولي أنه موازنة، ولا مش موازنة.

فكر خارج الصندوق! بدك هذا المعلم اللي ييجي، ويصبح في مهنة المعلم، ولديه شهادة تثبت امتلاكه لهذه القدرات. مش يدخل بالسنتين امتياز، سنتين مش سنة واحدة؛ سنتين امتياز، يعمل بالجامعة، يدرسوه دبلوم مهني، مسلكيات، علم نفس، يدرسوه، ويدخلوه، ويرفع راتبه.

أعتقد أنه الأوائل في كثير من الدول العربية راح يقدروا التعليم؛ لأنه التعليم ممتع.

يعني، صحيح مجهد ومرهق، لكن بتشوف إنتاجك أمامك. كل مخرجات الوطن هي نتيجة لعمل المدرسة وعمل المعلم، فله مكانة زي أيام زمان.

أيام زمان، أيامنا، كانت المهنة الأولى التعليم. يعني، أحسن مهنة كانت التعليم، بيذهبوه أشطر طلاب. طبعًا، بعضهم بالتوجيهي بيدرس، كانوا أشطر طلاب يذهبون إلى التعليم. كان المعلم وضعه خاص.

لذلك، كان التعليم، على فكرة، بالوطن العربي في السبعينات والستينات في القرن الماضي أفضل من الآن، إذا بتقارن، إذا بدك دراسة؛ لأنه تراجعوا، وصار الوضع المادي هو الأساس، والمادة أصبحت أساسية في المجتمع، حتى أصبحت غاية مش وسيلة للعيش.

فأصبحوا يفرقوا الناس، يقولك: «بدي أروح، وبدي أتزوج، بدي أشتري سيارة، بدي أبني». مهنة التعليم شو بدها تجيب؟ لذلك هذا السؤال إذا بيطرحوه في الوطن العربي، أعتقد فيه حلول كثيرة. هناك دول عربية تستطيع أن تدعم هذا المجال، الظروف المادية ممتازة، فيه بعض الدول تحتاج إلى تفكير خارج الصندوق في هذا الدرب.

أهداف العملية التعليمية: بين إنتاج المعرفة وتلبية احتياجات سوق العمل

باسم: اللي بيوضعوا المناهج والمحتوى، إحنا سألنا: هل في ذهنهم يكون صفات، أو معيارية محددة للطالب أو للتلميذ، ليصبح عليها لما يتخرج من المدرسة أو من الجامعة؟ سؤالي كالتالي: هل نحدد الشكل الذي نريد أن نستفيده من الطالب؟ هل نريده طالبًا منتجًا للمعرفة، ولا طالبًا ليلبي حاجات التصنيع في المجتمع؟ يعني، أن يكون جزء من الآلة الخدماتية التي تقدمها الشركات، أو أن يكون موظفًا؟ يعني، فيه تمييز: بدنا طالب منتج المعرفة، ولا طالب منتج في المصنع؟

فايز: هسه، هون تيجي نظرة الدولة، نظرتها وفهمها للواقع. يعني، هسه نحن في ظروف المعرفة هي وسيلة، المعرفة هي وسيلة للدعم. تيجي وتحط «والله بدي مواصفات شخص ينقل وينسخ» وكذا، لأ، ما بتظبط.

إذا الفكرة الرئيسية، لما أجي بدي أحط مواصفات المواطن الأردني، أو المواطن العربي اللي بدي إياه، أو الطالب العربي، بدي أنا أدرس في الواقع، الواقع الإقليمي، والواقع العالمي.

أنا شو المطلوب؟ الآن، أصبح العالم عبارة عن جهاز.

يعني، جهاز، هسه وأنا عندك، بجهاز بقدر أتواصل مع العالم كله. من قبل كان غرفة، بس هسه صار أكثر بوجود السمارت فون. فلذلك، أنت متطلبات الشخص في أي دولة، متطلبات واحدة: أنا بدي شخص مبدع، شخص ماهر، شخص متكيف مع العمل، شخص يتعامل مع الذكاء الصناعي، يتعامل؛ لأنه إحنا بدنا نتقدم، بدناش نوقف.

إذا الدول العربية استخدمت هذا الفكر بالبداية في مجموعة من التساؤلات، تحليل الواقع، وحللناه صح، واقعنا العالمي، ما بنقدر نقول واقعنا المحلي؛ لأنه زي ما قولتلك إحنا انفتحنا على العالم، لكن الانفتاح هذا لازم يكون عليه عمل.

إحنا ما بدنا نيجي نقعد 100 سنة و200 سنة، نقلد وكذا. لأ، إحنا فيه شيء جاهز في العالم، آخد خبرات وأستفيد منها، وأحط مواصفات الطالب اللي بدي إياه.

زي ما قولتلك، هي مواصفات ليست واحدة: مواصفات في مجال مهارات الحياة، المهارات الأساسية، المهارات المتخصصة، المهارات المهنية والتطبيقية.

كلها بدي أجمعها، بتطلع عشر صفات، كل واحدة أحللها، أحللها مفاهيم رئيسية وصولًا لمفهوم بسيط.

غياب التخطيط في اختيار التخصصات الجامعية ومواءمتها مع احتياجات سوق العمل

باسم: أنا أتفق معك، بس بعيد نفس السؤال: أنه أنت في البداية وصفت المرحلة التعليمية السابقة، ما قبل السبعينات أو الستينات، أنك الهدف تخرج طالب بنك معلومات.

الآن، صار فيه إمكانية نخرج طالب…

فايز: مبدع، لديه مهارة، لديه قدرة على الاكتشاف.

باسم: يكون جزء من آلة الاقتصاد، بس أنا، أنت عم بتخرج موظف، أنا أريد أن أخرج إنسان عنده القدرة على إنتاج المعرفة وتفعيلها، دون أن أعده فقط، أنه أنت بدي إياك تكون طبيب، مثلًا. في الأردن، الأردن فيه عندك حوالي أكثر مجتمع فيه نسبة مهندسين في الأردن، والمجتمع ما بحاجة لهاي الكمية. طب مين اللي سمح بهاي الظاهرة أنها تنمو؟ هذا دليل أنه عملية التعليم، أو سمحت للطلاب أنه يكون أداة لتنفيذ مهمات لها علاقة بالاقتصاد.

بدي، بيلزمني عدد من الموظفين، المهندسين، فأنت خرجت أدوات توظيف، مخرجتش ناس عندهم القدرة على صياغة المعرفة، وإنتاجها؟

فايز: شوف، هي رؤية، رؤية ما فيه مواصفات الطالب الذي نريد، ما فيه، هسه، من يتحكم في التخصصات الجامعية؟

باسم: رغبة الطالب.

فايز: رغبة الأهل، الأم والأب، ثم أبنائهم. بيشوف المهندسين والأطباء مشهورين، ودخلهم عالي، ومكانة ممتازة، وبيصير وزير، وبيصير كذا، هاي رغبة الأهل.

الآن، هاي القضية المشكلة: العشوائية في التعامل مع الإنسان هي أدت لذلك. العلم كثير من الأطباء والمهندسين في الأردن صعب جدًا أن يعملوا؛ ليس لديهم مهارات إبداعية في هذا المجال.

باسم: في الأردن مفيش أيدي ماهرة، مفيش «مصطلح إنجليزي»؟

فايز: هاي القضية حكينا فيها لما التقينا مع جلالة الملك بالأردن، وأعتقد قضية عامة.

الهرب من المقلوب… الآن، من الذي يتحكم في الهرب من المقلوب؟ عدم وجود رؤية، عدم وجود مواصفات للإنسان اللي بدنا إياه. بييجي الطالب يدخل للصف الأول، لا بيعرفوا وين ذكاءاته، ولا بيعرفوا قدراته، ولا شيء.

يصير 12 سنة الأهل حاطين براسهم اليوم الأول: «أنت طبيب»، بدون ما يعرفوا شيء عنه، أو «مهندس»، و«محامي»، هذول المهن الأساسية.

وبعض المهن اللي إلها علاقة بالسايبر ساينس، وإلها علاقة بهاي الأمور الآن. الذكاء الاصطناعي، فبيكونوا موجهينه. هسه، المدرسة ليس لها دور، لا باكتشاف الذكاء، ولا بتوجيهه، ولا بتنميته.

باسم: هذا مش مؤهل.

فايز: أه؛ لأنه ما فيه، مش محددين. أنت شوف، لو محددين مواصفات الطالب اللي بدنا إياه، واشتغلنا على إعادة النظر في فلسفتنا في التعامل مع الطالب، الوضع مختلف.

أنت أصلًا، بالصف الأول، ما بتحكي لابنك أي شيء، بس بتشوف التقرير اللي بييجي من المدرسة: أنه ما هي مواصفات ابنك؟ وذكاءاته، بعدين بتصير بتفكر.

إحنا بنفكر قبل ذلك. لماذا؟ لأنه بأنظمتنا التعليمية ما بنهتم بهاي القضايا، بصراحة. بييجوا الجماعة اللي بيحطوا المناهج والإطار العام، أصلًا بيبدأوا بدون ما يكون عندهم مراجعة للمواصفات اللي بدها إياها في الطالب بعد ما ينتهي من المرحلة التعليمية، المرحلة الثانوية العامة.

هون تدخل العشوائية، يدخل تحكم من الأهل، التحكم الذاتي: «أنا والله بدي أصير طبيب زي فلان». هل أنت قدراتك زي فلان؟ لأ، طب ما بتظبط.

لذلك، إحنا الطالب بيوصل بالأردن، وأعتقد بالدول العربية، بيروح إلى مسارات ليست مناسبة لقدراته وإمكانياته؛ لأنه الأغلبية بدهم طب وهندسة، الأغلبية بدهم يكملوا دكتوراه إذا كملوا البكالوريوس.

لذلك، الهرم، اللي هو مخرجات التعليم، اللي مرتبط أنه القمة الدكاترة، اللي بعديه الماجستير، أقل شوية اللي هو البكالوريوس، اللي أكثر اللي بالتكنيشن، اللي الثانوية العامة هدول اللي بيشتغلوا أكثر شيء.

إحنا العكس تمامًا، الهرم مقلوب. لذلك فيه مشكلة بطالة في الوطن العربي. كيف نشتغل هيك؟ يعني، كيف إحنا نشتغل في كل الدول العربية؟ بس بتعرف أديش فيه حاجة للمهن، وللمهن التقنية البسيطة، حاجة كبيرة.

بالأردن، عندنا مليون وافد بيعملوا في هاي المهن. طيب، لو إحنا عدلنا الهرم، طيب، يا سيدي مش مليون؛ 500 ألف إخوانا اللي بييجوا علينا، فيه اتفاقيات، 500 ألف من عندنا، كنا خلصنا البطالة، 50% من البطالة في الأردن.

باسم: لأنه في الأردن، المزارعين من فئة محددة، البنائين من فئة محددة، لكن تلك الإنسان الأردني قليل.

فايز: قليل؛ لأنه كلنا إحنا درسنا الدراسات المرتبطة برغبتنا ورغبة الأهل، مش بقدراتنا. لو إحنا اعتمدنا على القدرات والذكاءات تبعتنا، ترى، فيه ناس بيروحوا لمهن كثيرة جدًا وتستوعبهم. يعني، فيه واحد مثلًا بتلاقي قدراته إلها علاقة بالقدرات المكانية؛ هذا بيدرس التاريخ بيطلع مبدع، يدرس جغرافيا بيطلع مبدع. واحد عنده قدرات في الرياضيات هذا مهندس، مهندس أي مهنة.

وعلى فكرة، هدول الناس اللي بيتخرجوا وفق لقدراتهم، ترى بيلاقوا بلاده شغل. لماذا؟ يمتلكون مهارات عالية، وبيشتغل بالأردن، وبيشتغل بالخارج، وبيشتغل بأي دولة عربية، وبيشتغل برة.

لكن المشكلة وين؟ أنه الأغلبية بدها تخصصات غير مرتبطة بذكاءاتهم. امتلكوا شهادة، بس ما امتلكوا مهارة. وهذا سؤال كبير: هل امتلاك الشهادة يعني امتلاك المهارة؟ مش بالضرورة.

أنا يمكن يكون معي دكتوراه بعلم معين، وهذا المسار مش مناسب لي، وما عندي مهارات، ما بقدر أشتغل. لو اشتغلت أنا ما بتقدم، هاي القضية في الفلسفة، فلسفة…

غياب الاستقرار الإداري والتخصص التربوي في قيادة المؤسسات التعليمية وأثره في تطوير التعليم

باسم: وهاي خلق البطالة المقنعة؟

فايز: طبعًا، بطالة مخيفة. وللعلم، يعني، وهذا تحدثنا فيه مع جلالة الملك عبد الله في لقاء، وكان فيه قناعة تامة أنه نبدأ في الوزارة نشتغل بهذا الإطار. بس بتعرف عدم وجود السيستم، والنظام المنتقل من مرحلة إلى مرحلة، أو من شخص إلى شخص، للأسف الشديد مفقود في كثير من الدول.

باسم: مفيش تراكمية بالإنجازات.

فايز: مفيش تراكمية، ما فيه استقرار، يعني أنت مثلًا بدك تسلم، أنا شخصيًا 5 شهور وزير تربية وتعليم، مع أنه عملت 22 سنة، منهم 10 معلم، مشرف سنة، مدير فني سنة، مدير إدارة سنة ونصف، بعدين انتقلت للوزارة.

يعني، الفترة اللي أنت بتكون تنفيذي فيها، تستطيع تطبق كل أفكارك؟ ما انعطيت فرصة، بينما غيري تخصصه ليس تربية، وبقي في الوزارة أربعة سنوات. شوف التناقض الكبير كمان في هذه القضية، ولازم أحكي فيها، في منصتكم.

إحنا المشكلة أنه بعض الأحيان ننظر للتربية أنه علم ممكن يمتلكه أي شخص. ترى، أصعب من أصعب العلوم، في منظوري أنا، هو التربية. لماذا؟ ما فيه نظريات للمحتوى، ما فيه نظريات للمناهج؛ لذلك لكي تكون مبدع أنت، بتحط نظرية مرتبطة بالواقع، بينما في الطب فيه نظرية، في الهندسة فيه نظرية.

يعني، في الطب، أنت بدك تشخص مرض، بتأخذ عينة مباشرة، تفحص بالسماعة، أو بتأخذ عينات على المختبر، بيطلع عندك النتيجة، حتى لو سويتها بدون طبيب بتطلع.

مع احترامي للأطباء، في إلهم دور كبير، والمهندسين لكن التربية ليست سهلة. لا يستطيع أي شخص أن يقود المؤسسة التعليمية إلا ابن التربية والتعليم.

غياب الرؤية الواضحة والتخصص التربوي في إدارة وزارات التربية والتعليم وأثره في إصلاح المنظومة التعليمية

باسم: إحنا في ذكرنا عدد المهندسين في الأردن، أنه المجتمع لا يحتاج لهذا العدد كله. يمكن عشرة آلاف مهندس بيكفي البلد، والباقي تفضل أيدي عاملة.

فايز: صحيح، إحنا لو انسجمنا مع حكمة الخالق في خلق الإنسان، ترى الناس موزعين لحالهم، لا فيه داعي لتسوي شيء؛ لأنه إذا بتكون بالصف الأول بالأردن 150 ألف، هدول موزعين: 50، 60% تقنيين مهنيين، بيظل عندك 40% أكاديميين، اللي هم التخصصات الأكاديمية، والإنسانيات.

كل واحد بيلاقي مساره، وبالتالي هدول بيبدعوا. وعلى فكرة، هذا الطريقة اللي بحكي فيها، ما فيها رسوب في الثانوية العامة، لكن فيه ترتيب.

باسم: فيه معايير للقياس.

فايز: فيه ترتيب، يعني، ما فيه راسب؛ لأنه أنت وديته لمساره بجهده، إذا بذل جهد أكبر بيرتفع أكثر، لكن ما فيه رسوب.

باسم: دكتور، بعد هذا الحوار الشيق معك، وتجربتك الجميلة في هذا المضمار، أنا استنتجت أن موضوع التربية أو التعليم في المجتمعات العربية، هو صناعة الخلل فيه، خلل ذاتي، مش الخلل، يعني، سببه ذاتي أكثر ما يكون موضوعي.

يعني، فيه معوقات موضوعية في المجتمعات، أو في الدولة، لكن فيه شيء ذاتي خاص: أنه مفيش قرارات حاسمة في هذا الاتجاه، فيش رؤية واضحة للموضوع؛ وبالتالي، أنه نترك الأمر لاجتهاد الفرد بمعزل عن الرؤية اللي تمتلكها الدولة، أو المجتمع، أو وزارة التربية.

فايز: سيدي، أبعاد الموضوع هي موجودة، هي مرتبطة بحياتنا الآن، اتفاقياتنا، بوضعنا.

يعني بدها تكون فيه محددات لها علاقة بالإقليم، لها علاقة بقضايا معينة مطلوبة منا، أنه تكون موجودة عند طلبتنا، بحيث نراعي المجتمعات اللي بنعيشها. بنعيش في مكان واحد، فهذه قضية مهمة.

أنا ما أعتقد هاي فيها إشكالية. الإشكالية الكبيرة ذاتية، لها علاقة بالشخص. يعني، أنا كنت وزير تربية وتعليم، لم يتدخل أحد في أي عمل له علاقة بالوزارة. إذن، القضية عندي.

هسه، المشكلة لما أكون أنا ابن الوزارة، أو أي شخص غيري من أبناء الوزارة يعرف شو بدها الوزارة؛ لأنه القضية ما فيه ترف بالوقت.

بمعنى، سنتين زمان طالع، أو أي وزير، أو أربع سنوات أقصى حد. خلال أربع سنوات، لازم اليوم الأول تعرف شو المطلوب، ومش أنه… طبعًا، لازم تشارك الجميع.

يعني أنا مبدأ المشاركة في العمل أقول أساسية، لكن مشاركتي أنا كابن القطاع مختلف عن مشاركة شخص آخر.

أنا ابن هذا المجال، بعرف شو بده المعلم، قبل أصلًا ما آخذ معه في حديث، وبسمعه، وبفهم شو بده اللي إياه. بفهم كل الموظفين اللي عندي في تسلسل: شو اللي بدهم إياه؟ المجتمع شو بده؟ لأنه أنا كنت بالأصل طالب، ومواطن، وكنت معلم.

لذلك أعتقد أنه حتى ننجح بشكل كبير، أولًا: من يعمل بالتربية؟ هم بيقولوا: أي وزير بالعمل السياسي ينفع. لا سيدي أبدًا!

هذا تخصص، هذا مجال تخصصي. وزارة الخارجية وديت سياسة، فيه وزارات معينة، بس هذا لأ، لازم يكون عنده بعد نظر…

باسم: وبالذات التربية والتعليم، لازم يكون هناك فيه تخصص مهني واضح في التربية والتعليم.

فايز: مواصفات! زي ما بقول: بدي مواصفات للطالب، مواصفات من يكون مسؤول؟

باسم: من هو المسؤول عن وضع المحتوى للطالب؟

فايز: أحسنت. هسه، يكون متخصص في مجال التربية، لازم يكون برضه رجل سياسة؛ لأنه السياسة هي اللي بتحكم: أنه هذا القرار يصلح في هذا الوقت، ولا يصلح في وقت آخر، هاي قضية.

إذن التخصص في البداية. وأنا أعتقد أنه لو كل دولة عربية اهتمت في هذا المجال، أنه ما تقول: «والله لأ هو بيدير الوزارة، ممكن يتعامل»، لأ سيدي! حتى يكون فيه عندنا مخرجات سريعة، وإحنا معنا ترف في الوقت، يجب أن يكون متخصص، لديه مواصفات خاصة، بعد نظر، قدرة على العمل، ذكاء معين في العلاقات العامة، والعمل الجماعي.

مش غلط، يعني بدك تجيب وزير تديره، وبالأخير المخرجات بتأثر.

أهمية التكامل بين مؤسسات الدولة والمجتمع في تطوير التعليم وبناء الإنسان القادر على الإنتاج

القضية هاي المهمة بالرأس، وبعدين اختيار الأشخاص. إحنا مشكلة في بعض الوزارات في الوطن العربي، أنه فيه كتير تشعب. يعني، من الذي يحكم؟ وكيف تستطيع أن تعد أنت الهيكل التنظيمي؟

باسم: مفيش تراكمية في إنجاز الوزارات.

فايز: لأ، تلاقي وزارة فيها أمينين، أو ثلاثة. طيب، كيف بدها تستقيم هذه القرارات الانسيابية بين وزير إلى ثلاث جهات، والأخير بتاخدها على الغرفة الصفية؟ الغرفة الصفية واحدة.

فأنا مع أنه يكون فيه كل الدول العربية جلسة عصف ذهني، اللي تحدثنا فيها من البداية، المواصفات للجميع: للعاملين، وبالأخير مواصفات الطالب اللي بدنا إياه.

باسم: اختيار المحتوى.

فايز: وما هو دور الأسرة في التعليم؟ ما هو دور المؤسسات الدينية؟ دور الجهات الإعلامية؟ إذا ما صار الموضوع موضوع تكاملي تحت إشراف مؤسسات الدولة بشكل…

باسم: سيبقى في انهيار.

فايز: سيبقى في انهيار، وسيبقى المجتمع ضعيف، وما فيه لا ناتج محلي. ما بقصد الناتج المحلي الإجمالي المرتبط بالثروات. أنا بحكي الناتج المحلي الإجمالي المرتبط بموارد المجتمع.

باسم: صح، بقدرته على الإنتاج.

فايز: واقتصاد التعليم، على فكرة، يمكن أفضل استثمار بالعالم، هو بالتعليم. لماذا؟ يعني، هذا السؤال كتير بيسألوني ياه.

باسم: شعب جاهل لا ينتج.

فايز: بيسألوني: ليه؟ استثمار 1 مليار وحدة واحدة في التعليم يعطيك 9. لماذا؟ لأن مخرجات التعليم تخدم كل المهن. يعني من وين يتخرج الموظف؟

باسم: كل المهن.

فايز: المهندس، الطبيب، المحامي، مقدم البرامج، رجل الأعمال، كلهم من التربية والتعليم؛ لأنه هو استثمار مضاعف.

باسم: ولهذا، أهمية التعليم والتربية في المجتمعات العربية أهمية قصوى، يجب أن تُدار جماعةً أو جماعيةً، ويجب أن يكون هناك رؤية مركزية في الدولة، في كيفية صياغة المحتوى الذي سيقدم للطلاب. وأن يكون عندهم تصور خاص: ما هو المواطن الذي نريد أن ننشئه في المستقبل لقيادة المجتمع؟

فايز: هذا الأساس.

باسم: دكتور فايز، أنا جدًا سُعدت في الحوار معك، وأرجو أنه يكون هناك من يستفيد من تجربتك التي تحدثت عنها، وإن شاء الله بيكون عندنا مجال آخر لنلتقي في منصة «مجتمع».

فايز: شكرًا لك. يعني، أنت تمثل العقلية العربية المتحررة اللي بدنا إياها. يعني، لو بدي أنا أحط مواصفات الطالب، أنا بحط مواصفات الدكتور باسم، اللي هو قدوة لنا، وكتير بنسمع برامجه، وإن شاء الله يكون فيه مخرجات إيجابية لكل جهد مبذول.

باسم: شكرًا لكم، وإلى اللقاء في حلقة جديدة من برنامج «مجتمع». إلى اللقاء.